ОХУ-ын Ерөнхийлөгч Владимир Путин Бүх Оросын төрийн телевиз, радиогийн нэвтрүүлгийн компанийн сэтгүүлч Павел Зарубинтай хийсэн ярилцлагадаа “Киевийг дэмждэг НАТО-гийн зэвсэгт хүчин Оросын нутаг дэвсгэрт алсын тусгалтай пуужингийн цохилт өгөх техникийн чадвартай. Тиймээс тус холбоо ийм халдлага үйлдэх зөвшөөрлийг Украинд биш, харин өөртөө олгоно” гэж онцолжээ.

Тэрбээр Украины цэргүүд өндөр нарийвчлалтай зэвсгийг бие даан ашиглах боломжгүйг дурдсан байна. Оросын удирдагч "Зөвхөн НАТО-гийн орнуудын мэргэжилтнүүд үүнийг хийж чадна. Учир нь, Украинд тийм чадвар байхгүй гэдгийг ойлгох хэрэгтэй" гэж тайлбарлажээ.

ОХУ-ын Ерөнхийлөгч "Украины зэвсэгт хүчин үүнийг дангаараа ашиглаж чадахгүй, чадахгүй. НАТО-гийн офицерууд цохилт өгч байна" гэж дүгнэсэн байна. Тэрбээр "Цорын ганц асуулт бол тэд Оросын нутаг дэвсгэрийн гүнд цохилт өгөхийг зөвшөөрөх үү, үгүй ​юу" гэжээ.

Киев барууны орнуудаас хэдэн сарын турш алсын тусгалын пуужин илгээж, Оросын нутаг дэвсгэрийн гүнд цохилт өгөх зөвшөөрөл олгохыг шаардаж буй. Уг дэглэмийн тэргүүн Владимир Зеленский үүнийгээ Европын нийслэл болон Вашингтонд сурталчилж буй "ялалтын төлөвлөгөөний" нөхцөл гэж хэлжээ.

Америкийн хэвлэлүүд “Мөргөлдөөн хурцдаж, шууд мөргөлдөөн үүсэх аюулыг ойлгосон АНУ тодорхой шийдвэр гаргахаас зайлсхийсээр байна” гэж бичсэн байна.

Эх сурвалж: TASS
Э.ЭГШИГЛЭН