Улсын Их Хурлын Хууль зүйн байнгын хорооны өнөөдөр (2024.10.22)-ийн хуралдаанаар Монгол Улсын 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслүүдийн хоёр дахь хэлэлцүүлгийг хийв.

Энэ үеэр Сангийн сайд Б.Жавхлан “Монгол Улсын 2025 оны төсвийн бодлого хэрэгжсэнээр нэгдсэн төсвийн нийт орлогын хэмжээг 36.8 их наяд, төсвийн нийт зарлага 35.8 их наяд, нэгдсэн төсвийн суурь тэнцэл 1.9 их наяд төгрөгийн ашигтай байхаар төлөвлөсөн.

Ирэх оны төсвийн төсөлд Засгийн газрын 2024-2028 оны үйл ажиллагааны хөтөлбөрт тусгагдсан эдийн засгийн тулгамдсан болон хугацаа шаардсан суурь асуудлуудыг шийдвэрлэж эхлэх, бүсчилсэн хөгжлийн цогц реформын эхний шат болон нийслэлийн төвлөрлийг сааруулах том төслүүдийг эхлүүлэх зорилт тавьсан.

Монгол Улсын 2025 оны нэгдсэн төсвийн төсөлд тэнцвэржүүлсэн орлого 33,864.7 тэрбум төгрөг буюу ДНБ-ий 35.6 хувь, нийт зарлага 35,795.2 тэрбум төгрөг буюу ДНБ-ий 37.7 хувь, төсвийн суурь тэнцэл 1,909.5 тэрбум төгрөгийн ашигтай, төсвийн тэнцвэржүүлсэн тэнцэл 1,930.5 тэрбум төгрөгийн алдагдалтай буюу ДНБ-ий 2.0 хувьтай тэнцэж байхаар төлөвлөсөн.

Монгол Улсын 2025 оны төсвийн төсөлд Хууль зүйн байнгын хорооны харьяа Хууль зүй, дотоод хэргийн сайд 1,815.1 тэрбум төгрөг, Улсын дээд шүүхийн ерөнхий шүүгч 32.9 тэрбум төгрөг, Шүүхийн ерөнхий зөвлөлийн дарга 319.7 тэрбум төгрөг, Шүүхийн сахилгын хорооны дарга 6.4 тэрбум төгрөг,

Улсын ерөнхий прокурор 145.7 тэрбум төгрөг, Хүний эрхийн Үндэсний Комиссын дарга 15.6 тэрбум төгрөг, Авлигатай тэмцэх газрын дарга 58.2 тэрбум төгрөг, Цагаатгах ажлыг удирдан зохион байгуулах улсын комиссын дарга 1.4 тэрбум төгрөгийн төсөвтэй байхаар тусгасан” гэлээ.

Н.ДАВААЦЭНД