Монгол Улсын Шадар сайд С.Амарсайхан өнөөдөр (2024.10.05) Өвөрхангай аймагт хүрэлцэн ирж, аймгийн Онцгой Комиссыг хуралдуулж, цаг үеийн нөхцөл байдлын талаар мэдээлэл солилцож, үүрэг, даалгавар өглөө.

Монгол Улсын Шадар сайд, Улсын Онцгой Комиссын дарга С.Амарсайхан хангайн бүсэд “Шинэ хоршоо” хөдөлгөөний явц болон өвөлжилтийн бэлтгэл хангах ажлын явц ямар байгааг газар дээр нь шалгаж, үнэлэлт дүгнэлт өгөхөөр Өвөрхангай аймагт ийн ажиллав.

Өвөрхангай аймагт нийт нутгаар өвөлжилт хүндэрч, зудтай байсан бөгөөд үргэлжлэн хавар, зуны хүчтэй салхи шуурга, үер ус, гал түймрийн гамшигт цөөнгүй айл өрх өртсөн тул Богд, Бүрд, Хархорин, Нарийнтээл, Баруунбаян-Улаан сумдын малчин өрхүүдэд Улсын онцгой Комиссоос гэр олгохоор шийдвэрлэлээ.

Мөн гамшгийн хор уршгийг арилгахад зориулж аймгийн Онцгой комисст 100 сая төгрөг, Аймгийн Онцгой байдлын газарт туулах чадвар сайтай автомашин, Аймгийн онцгой комисст орчин үеийн хүчин чадал бүхий ус соруулах помп олгохоор шийдвэрлэлээ.

Шадар сайд “Монгол Улсын Засгийн газрын 2024-2028 оны үйл ажиллагааны хөтөлбөр, Бүсчилсэн хөгжлийн үзэл баримтлалд Хангайн бүсийг “Уламжлалт мал аж ахуйн төрөлжсөн, хот байгуулалтын дэд бүс” болгон хөгжүүлэхээр төлөвлөсөн” хэмээн онцлов.

Тэрбээр “Уур амьсгалын өөрчлөлтөөс улбаатай байгалийн гамшигт үзэгдлийн тоо, давтамж, хор хөнөөл цаашид ч дэлхий нийтээр өсөн нэмэгдэх судалгаа тооцоолол гарсан.

Иймд хөдөө аж ахуйн салбар хамтарч нэгдэж байж гамшгийн эрсдэлийг сөрөн тэсвэрлэх чадавхаа сайжруулах асуудал нэн чухал учраас Засгийн газраас “Шинэ хоршоо” хөдөлгөөнийг хэрэгжүүлж байна. 2024-2028 онд нийт 5 их наяд төгрөгийн хөнгөлөлттэй зээлийн санхүүжилтийг малчдад олгохоор төлөвлөсөн.

Цаашид Ногоон санхүүжилтийн эх үүсвэрүүдийг татах чиглэлд анхаарч, зээл авсан хоршоологчдын зээлийн зарцуулалт, хоршооны үйл ажиллагааны үр дүн, хэрэгжилтийн хяналтыг сайжруулж, Зээлийн батлан даалтын санд үүсэж болзошгүй эрсдэлээс хамгаалах үүднээс батлан даалтуудыг хувийн даатгалын компаниар даатгуулж, тус зардлыг улсын төсөвт суулгахаар зорьж байна” гэлээ.

Зарим сумдад гантай байсан тул өвөлжилт хүндрэх төлөвтэй байгаа учраас аймгийн Онцгой комиссоос өвөлжилтийн бэлтгэл хангах хүрээнд шаардлагатай арга хэмжээг авч хэрэгжүүлж, Засгийн газрын тогтоол, УОК-ын албан даалгаврыг биелүүлэн ажиллаж байгаагаа хэллээ.

Н.ДАВААЦЭНД